We are experiencing a website issue that may affect images and PDFs loading. We are working hard to get this fixed as soon as possible.

Dismiss
ato logo
Search Suggestion:

ܩܝܵܡܲܢ

Last updated 25 June 2023

ܝܼܕܹܝܥܡܘܼܢ ܠܗܘܿܢ ܡܸܫܬܲܐܠܵܢ̈ܘܼܝܵܬܲܢ ܩܵܐܠܵܘܟ݂ܘܿܢ ܘܒܘܼܕ ܡܸܢܕܝܼ ܕܒܸܛܠܵܒܵܐ ܝܘܲܚ ܡܸܢܵܘܟ݂ܘܿ.

ܢܩܘܿܪܘܼܢ ܝܲܢ ܢܩܘܿܫܘܼܢ ܠܲܐܟ݂ܵܐ ܠܡܲܥܒ݂ܘܼܪܹܐ ܨܚܵܚܵܐ.

ܒܘܼܕ ܩܝܵܡܲܢ

ܡܸܫܬܲܐܠܵܢܘܼܬܲܢ ܩܵܐܠܵܘܟ݂ܘܿܢ

ܡܘܿܕܝܼ ܟܹܐ ܛܵܠܒܲܚ ܡܸܢܵܘܟ݂ܘܿܢ

ܦܵܣܘܼܥܝܵܬܹ̈ܐ ܕܫܵܩܠܝܼܬܘܿܢ ܠܗܘܿܢ ܐܸܢ ܒܵܥܝܼܬܘܿܢ ܕܚܕܵܐ ܩܛܵܥܬܵܐ ܦܵܝܫܵܐ ܨܘܼܚܨܝܼܬܵܐ ܚܕܵܐ ܓܵܗܵܐ ܐ݇ܚܹܪ݇ܢܵܐ

ܦܵܣܘܿܥܝܵܬܹ̈ܐ ܕܫܵܩܠܝܼܬܘܿܢ ܠܗܘܿܢ ܐܸܢ ܠܵܐ ܝܬܘܿܢ ܚܸܕܝܹܐ ܒܚܸܠܡܲܬܲܢ

ܕܵܐܟ݂ܝܼ ܠܡܲܚܒܘܼܪܹܐ ܩܵܐܠܲܢ

ܒܘܼܕ ܩܝܵܡܲܢ

ܐܲܚܢܲܢ ܟܹܐ ܡܕܲܒܪܲܚܠܗܘܿܢ ܚܸܠܡܲܬܹ̈ܐ ܕܡܲܕܲܐܬܵܐ ܕܐܘܿܣܬܪܵܠܝܵܐ ܘܕܣܘܼܦܲܪܐܵܢܝܘܿܒ݂ܵܝܫܵܢ ܘܕܣܲܓ݂ܲܠܬܵܐ ܕܒܸܣܢܝܼܣܹ̈ܐ. ܐܵܦ ܟܹܐ ܣܵܢܕܲܚܠܵܗ̇ ܡܲܡܛܵܝܬܵܐ ܕܝܘܼܬܪܵܢܹ̈ܐ ܕܫܘܼܠܛܵܢܵܐ ܩܵܐ ܟܢܘܼܫܬܵܐ.

ܚܸܠ̈ܡܲܬܲܢ ܝܼܢܵܐ ܐܲܠܨܵܝܹ̈ܐ ܩܵܐ ܣܢܵܕܬܵܐ ܕܐܘܼܪܚܵܐ ܕܚܲܝܘܼܬܵܐ ܕܟܹܐ ܡܲܒܣܸܡܲܚ ܒܝܼܵܗ̇ ܓܵܘ ܐܘܿܣܬܪܵܠܝܵܐ، ܐܲܝܟ݂ ܝܲܨܝܼܦܘܼܬܵܐ (ܡܲܣܲܡܬܵܐ ܕܒܵܠܵܐ) ܕܚܘܼܠܡܵܢܵܐ ܘܝܘܼܠܦܵܢܵܐ ܘܒܸܢܝܵܢܹ̈ܐ ܬܲܚܬܵܝܹ̈ܐ ܕܟܢܘܼܫܬܵܐ.

ܐܲܚܬܘܿܢ ܐܝܼܬܠܵܘܟ݂ܘܿܢ ܚܲܕ ܓܲܪܵܐ ܠܗܲܝܘܼܪܹܐ ܩܵܐ ܡܲܝܬܵܝܬܵܐ ܕܐܵܗܵܐ ܡܸܢܕܝܼ ܠܐܝܼܬܘܼܬܵܐ. ܚܲܕܟܡܵܐ ܓܵܗܹ̈ܐ ܡܸܫܬܲܐܠܵܢܘܼܝܵܬܵܘܟ݂̈ܘܿܢ ܒܸܕ ܛܵܠܒܝܼ ܡܸܢܵܘܟ݂ܘܿܢ ܕܦܵܠܚܝܼܬܘܿܢ ܥܲܡܲܢ.

ܐܲܚܢܲܢ ܒܵܥܲܚ ܕܚܲܬܸܬܲܚ (ܕܐܲܟܸܕܲܚ) ܕܢܸܣܝܵܢܵܘܟ݂ܘܿܢ ܦܫܝܼܛܵܐ ܝܠܹܗ ܘܡܗܝܼܪܵܐ ܒܟܠ ܥܸܕܵܢܵܐ ܕܐܲܚܬܘܿܢ ܦܵܠܚܝܼܬܘܿܢ ܥܲܡܲܢ.

ܐܵܗܵܐ ܩܝܵܡܵܐ:

  • ܦܲܫܘܼܩܹܐ ܝܠܹܗ ܡܘܿܕܝܼ ܡܵܨܝܼܬܘܿܢ ܕܣܵܒܪܝܼܬܘܿܢ ܐܝܼܡܲܢ ܕܦܠܵܚܵܐ ܝܬܘܿܢ ܥܲܡܲܢ
  • ܝܼܠܹܗ ܩܵܐ ܟܠܚܲܕ ܦܲܪܨܘܿܦܵܐ ܕܦܠܵܚܵܐ ܝܠܹܗ ܥܲܡܲܢ
  • ܒܸܢܝܵܐ ܝܠܹܗ ܥܲܠ ܩܵܢܘܿܢܹ̈ܐ ܘܛܲܟ݂ܣܹ̈ܐ ܘܐܸܣܛܘܿܟ݂ܣܹ̈ܐ ܕܬܲܪܘܸܢܬܲܢ ܓܵܪܲܓ ܕܫܵܠܡܲܚ ܐܸܠܲܝܗܝ.

ܬܵܡܵܐ ܐܵܦ ܐܝܼܬ ܦܵܣܘܼܥܝܵܬܸ̈ܐ ܕܡܵܨܝܼܬܘܿܢ ܕܫܵܩܠܝܼܬܘܿܢ ܠܗܘܿܢ ܐܸܢ ܠܵܐ ܝܬܘܿܢ ܣܲܙܓܘܼܪܹܐ ܥܲܡ ܚܕܵܐ ܩܛܵܥܬܵܐ ܕܟܹܐ ܥܵܒ݂ܕܲܚܠܵܗ̇ ܝܲܢ ܐܸܢ ܗܲܡܘܼܢܹܐ ܝܬܘܿܢ ܕܐܲܚܢܲܢ ܠܵܐ ܝܘܲܚ ܦܠܝܼܚܹܐ ܐܲܝܟ݂ ܕܩܝܵܡܵܐ ܒܸܛܠܵܒܵܐ ܝܠܹܗ.

ܡܸܫܬܲܐܠܵܢܘܼܬܲܢ ܩܵܐܠܵܘܟ݂ܘܿܢ

ܡܲܥܡܲܠܬܵܐ ܟܹܐܢܬܵܐ ܘܡܸܬܩܲܒܠܵܢܬܵܐ

ܐ݇ܚܝܵܢܘܼܬܲܢ ܥܲܡܵܘܟ݂ܘܿܢ ܒܢܝܼܬܵܐ ܝܠܵܗ̇ ܥܲܠ ܡܗܲܝܡܢܘܼܬܵܐ ܘܡܝܲܩܪܵܢܘܼܬܵܐ ܡܫܲܘܬܦܹ̈ܐ. ܐܲܚܢܲܢ ܐ݇ܣܝܼܪܹܐ ܝܘܲܚ ܒܩܵܘܠܵܐ ܕܗܵܘܲܚ ܟܹܐܢܹ̈ܐ ܘܐܝܼܬܝܼܩܘܿܢܵܝܹ̈ܐ ܘܡܸܫܬܲܐܠܵܢܹ̈ܐ ܩܵܐ ܟܠܚܲܕ ܡܸܢܕܝܼ ܕܥܵܒ݂ܕܲܚܠܹܗ.

ܐܲܚܢܲܢ:

  • ܡܲܥܡܲܠܬܲܢ ܥܲܡܵܘܟ݂ܘܿܢ ܒܸܕ ܗܵܘܝܵܐ ܒܒܲܣܝܼܡܘܼܬܵܐ ܘܒܡܝܲܩܪܵܢܘܼܬܵܐ ܘܒܐܝܼܩܪܵܐ
  • ܒܸܕ ܦܵܠܚܲܚ ܒܡܗܘܼܡܢܘܼܬܵܐ ܘ ܒܨܸܦܝܘܼܬܵܐ
  • ܠܹܐ ܗܵܘܲܚ ܚܵܙܝܵܢܹ̈ܐ ܕܦܵܬܵܐ ܘܒܸܕ ܦܵܠܚܲܚ ܒܡܗܘܼܡܢܘܼܬܵܐ
  • ܒܸܕ ܚܲܫܒܸܢܲܚ ܠܵܘܟ݂ܘܿܢ ܐܲܝܟ݂ ܐ݇ܢܵܫܹ̈ܐ ܫܲܪܝܼܪܹ̈ܐ ܫܒ݂ܘܿܩ ܡܸܢ ܐܸܢ ܚܵܫܒ݂ܲܚ ܕܠܵܐ ܝܬܘܿܢ ܫܲܪܝܼܪܹ̈ܐ ܘܒܸܕ ܝܵܗܒ݂ܲܚܠܵܘܟ݂ܘܿܢ ܦܘܼܪܣܵܐ ܕܡܲܦܪܸܡܝܼܬܘܿܢ ܠܲܢ
  • ܒܸܕ ܦܵܠܚܲܚ ܥܲܡ ܐ݇ܢܵܫܹ̈ܐ ܕܓܘܼܒܝܲܝܗܝ ܝܬܘܿܢ ܕܗܵܘܝܼ ܩܲܝܘܼܡܹܐ ܩܵܐܠܵܘܟ݂ܘܿܢ، ܩܵܐ ܛܘܼܦ̮ܣܵܐ ܚܲܕ ܡܵܠܘܿܟ݂ܵܐ ܚܲܒܝܼܪܵܐ.

ܚܸܠܡܲܬ ܚܲܒܝܼܪܬܵܐ

ܐܲܚܢܲܢ ܝܵܕܥܲܚ ܕܗܲܩܘܼܝܵܬܵܘܟ݂̈ܘܿܢ ܘܡܸܫܬܲܐܠܵܢܘܼܝܵܬܵܘܟ݂̈ܘܿܢ ܬܚܘܼܬ ܩܵܢܘܿܢܵܐ ܡܵܨܝܼ ܕܗܵܘܝܼ ܡܥܲܩܕܹ̈ܐ. ܢܝܼܫܲܢ ܝܼܠܹܗ ܕܡܲܩܪܸܒ݂ܲܚܠܵܘܟ݂ܘܿܢ ܡܵܘܕܥܵܢܘܼܬܵܐ ܫܲܪܝܼܪܬܵܐ ܘܡܸܬܡܲܛܝܵܢܬܵܐ ܘܡܵܘܬܪܵܢܬܵܐ ܘܚܸܠܡܲܬ ܠܗܲܝܘܼܪܵܘܟ݂ܘܿܢ ܕܦܲܪܡܝܼܬܘܿܢ ܠܗܘܿܢ ܗܲܩܘܼܝܵܬܵܘܟ݂̈ܘܿܢ ܘܕܬܲܡܸܡܝܼܬܘܿܢ ܠܗܘܿܢ ܡܸܫܬܲܐܠܵܢܘܼܝܵܬܵܘܟ݂̈ܘܿܢ.

ܐܲܚܢܲܢ:

  • ܒܸܕ ܓ̰ܲܘܸܒܲܚܠܗܘܿܢ ܒܵܥܘܼܝܵܬܵܘܟ݂̈ܘܿܢ ܘܡܲܩܪܸܒ݂ܲܚܠܵܘܟ݂ܘܿܢ ܡܵܘܕܥܵܢܘܼܬܵܐ ܫܲܪܝܼܪܬܵܐ ܘܡܸܬܦܲܪܡܝܵܢܬܵܐ ܘܒܥܸܕܵܢܵܐ ܠܚܝܼܡܬܵܐ
  • ܒܸܕ ܦܵܠܚܲܚ ܥܲܡ ܟܢܘܼܫܬܵܐ ܩܵܐ ܣܲܟܲܡܬܵܐ ܕܡܠ̈ܘܿܐܲܢ ܘܚܸܠ̈ܡܲܬܲܢ ܩܵܐ ܕܗܵܘܝܵܐ ܡܲܦܠܲܚܬܲܝܗܝ ܗܵܣܵܢܵܝܝܼ ܘܕܗܵܘܝܼ ܚܵܒ݂ܘܿܫܹ̈ܐ
  • ܒܸܕ ܡܲܩܪܸܒ݂ܲܚܠܗܘܿܢ ܚܸܠ̈ܡܲܬܲܢ ܒܚܕܵܐ ܐܘܼܪܚܵܐ ܪܲܩܡܵܝܬܵܐ ܫܒ݂ܘܿܩ ܡܸܢ ܐܝܼܡܲܢ ܕܚܕܵܐ ܐܘܼܪܚܵܐ ܐ݇ܚܹܪ݇ܬܵܐ ܝܼܠܵܗ̇ ܒܘܼܫ ܠܚܝܼܡܬܵܐ.

ܣܢܵܕܬܵܐ ܘܗܲܝܲܪܬܵܐ

ܐܲܚܢܲܢ ܦܲܪܡܘܼܝܹܐ ܝܘܲܚ ܕܐ݇ܢܵܫܹ̈ܐ ܒܲܠܟܵܐ ܣܵܢܩܝܼ ܠܗܲܝܲܪܬܵܐ ܒܐܘܼܪ̈ܚܵܬܹܐ ܦܪ̈ܝܼܫܹܐ ܘܒܥܸܕܵܢܵܬܹ̈ܐ ܦܪ̈ܝܼܫܹܐ. ܐܲܚܢܲܢ ܝܵܕܥܲܚ ܕܒܲܠܟܵܐ ܗܵܘܝܵܐ ܒܘܼܫ ܥܲܣܩܵܐ ܩܵܐܠܵܘܟ݂ܘܿܢ ܕܬܲܡܸܡܝܼܬܘܿܢ ܠܗܘܿܢ ܡܸܫܬܲܐܠܵܢܘܼܝܵܬܵܘܟ݂̈ܘܿܢ ܐܸܢ ܐܲܚܬܘܿܢ ܢܲܣܘܼܝܹܐ ܝܬܘܿܢ ܚܕܵܐ ܙܲܒܘܼܢܘܼܬܵܐ ܝܲܢ ܥܸܕܵܢܵܬܹ̈ܐ ܥܲܣܩܹ̈ܐ ܝܲܢ ܦܝܼܫܹܐ ܝܬܘܿܢ ܥܘܼܓ̰ܸܙܹܐ ܒܩܲܘܲܡܝܵܬܹ̈ܐ ܐܘܼܠܨܵܢܵܝܹ̈ܐ. ܟܲܕ ܐܲܚܢܲܢ ܠܹܐ ܡܲܨܲܚ ܕܫܵܝܦܲܚܠܗܘܿܢ ܡܸܫܬܲܐܠܵܢܘܼܝܵܬܵܘܟ݂̈ܘܿܢ ܒܣܲܗܡܵܐ ܙܵܘܕܵܐ ܕܥܸܕܵܢܵܬܹ̈ܐ، ܐܝܼܢܵܐ ܒܲܠܟܵܐ ܕܬܵܡܵܐ ܗܵܘܝܼ ܐܘܼܪ̈ܚܵܬܹܐ ܕܡܵܨܲܚ ܗܲܝܸܪܲܚܠܵܘܟ݂ܘܿܢ ܕܬܲܡܸܡܝܼܬܘܿܢ ܠܗܘܿܢ ܡܸܫܬܲܐܠܵܢܘܼܝܵܬܵܘܟ݂̈ܘܿܢ.

ܐܲܚܢܲܢ:

  • ܒܸܕ ܡܲܫܡܥܲܚ ܠܐܲܗܘܵܠܵܘܟ݂̈ܘܿܢ ܘܫܵܩܠܲܚ ܝܘܼܩܪܵܐ ܒܘܼܕ ܕܝܼܲܝܗܝ ܟܠ ܐܲܝܟܵܐ ܕܡܵܨܲܚ
  • ܒܸܕ ܣܵܢܕܲܚܠܵܘܟ݂ܘܿܢ ܒܥܸܕܵܢܵܐ ܕܩܲܘܲܡܝܵܬܹ̈ܐ ܐܘܼܠܨܵܢܵܝܹ̈ܐ ܘܒܥܸܕܵܢܵܬܹ̈ܐ ܥܲܣܩܹ̈ܐ
  • ܒܸܕ ܗܲܝܸܪܲܚܠܵܘܟ݂ܘܿܢ ܐܸܢ ܣܢܝܼܩܹܐ ܝܬܘܿܢ ܠܗܲܝܲܪܬܵܐ ܕܦܲܪܡܝܼܬܘܿܢ ܠܗܘܿܢ ܝܲܢ ܕܡܵܛܝܼܬܘܿܢ ܠܚܸܠ̈ܡܲܬܲܢ.

ܫܲܝܢܘܼܬܵܐ ܕܡܵܘܕܥܵܢܘܼܬܵܘܟ݂ܘܿܢ ܦܲܪܨܘܿܦܵܝܬܵܐ ܘܕܕܝܼܠܵܢܵܝܘܼܬܵܘܟ݂ܘܿܢ

ܐܲܚܢܲܢ ܟܹܐ ܡܲܬܒ݂ܲܚ ܪܵܒܵܐ ܝܘܼܩܪܵܐ ܥܲܠ ܡܸܫܬܲܐܠܵܢܘܼܬܵܐ ܕܢܛܵܪܬܵܐ ܕܡܵܘܕܥܵܢܘܼܬܵܘܟ݂ܘܿܢ ܦܲܪܨܘܿܦܵܝܬܵܐ. ܐܲܚܢܲܢ ܝܵܕܥܲܚ ܟܡܵܐ ܐܵܢܲܢܩܵܝܬܵܐ ܝܠܵܗ̇ ܕܝܼܠܵܢܵܝܘܼܬܵܐ ܘܫܲܝܢܘܼܬܵܐ ܕܡܵܘܕܥܵܢܘܼܬܵܘܟ݂ܘܿܢ ܦܲܪܨܘܿܦܵܝܬܵܐ ܓܵܘ ܕܐܵܗܵܐ ܕܵܪܵܐ ܕܥܵܠܡܵܐ ܪܲܩܡܵܝܵܐ.

ܐܲܚܢܲܢ:

ܦܵܝܫܝܼܬܘܿܢ ܡܘܼܕܸܥܝܹܐ ܡܘܿܕܝܼ ܩܲܘܘܼܡܹܐ ܝܠܹܗ

ܐܲܚܢܲܢ ܐ݇ܣܝܼܪܹܐ ܝܘܲܚ ܒܩܲܘܠܵܐ ܕܗܵܘܲܚ ܨܲܠܝܼܠܹ̈ܐ ܘܡܸܫܬܲܐܠܵܢܹ̈ܐ ܓܵܘ ܦܘܼܠܚܵܢܲܢ ܥܲܡܵܘܟ݂ܘܿܢ ܘܥܲܡ ܟܢܘܼܫܬܵܐ.

ܐܲܚܢܲܢ:

  • ܒܸܕ ܦܲܫܩܲܚܠܗܘܿܢ ܩܛܵܥ̈ܝܵܬܲܢ ܩܵܐܠܵܘܟ݂ܘܿܢ
  • ܒܸܕ ܡܲܕܥܲܚܠܵܘܟ݂ܘܿܢ ܒܘܼܕ ܫܘܼܘܫܵܛܲܢ
  • ܒܸܕ ܝܵܗܒ݂ܲܚ ܘܫܵܩܠܲܚ ܥܲܡܵܘܟ݂ܘܿܢ ܘܦܲܫܩܲܚܠܗܘܿܢ ܗܲܩܘܼܝܵܬܵܘܟ݂̈ܘܿܢ ܘܡܸܫܬܲܐܠܵܢܘܼܝܵܬܵܘܟ݂̈ܘܿܢ ܘܒܸܕ ܗܲܓܲܚܠܗܘܿܢ ܓ̈ܘܼܒܵܝܲܢ ܚܕܵܐ ܡܸܢ݇ܕܪܹܫ
  • ܒܸܕ ܗܲܝܸܪܲܚܠܵܟ݂ܘܿܢ ܕ ܡܵܛܝܼܬܘܿܢ ܠܡܵܘܕܥܵܢܘܼܬܵܘܟ݂ܘܿܢ، ܘܠܡܵܘܕܥܵܢܘܼܬܵܐ ܕܟܹܐ ܗܲܝܸܪܵܐ ܠܲܢ ܕܥܵܒ݂ܕܲܚ ܩܛܵܥܝܵܬܹ̈ܐ، ܐܲܝܟܵܐ ܕܒܸܠܚܵܡܵܐ ܝܠܵܗ̇.

ܡܘܿܕܝܼ ܟܹܐ ܛܵܠܒܲܚ ܡܸܢܵܘܟ݂ܘܿܢ

ܐܲܚܬܘܿܢ ܒܹܕ ܗܵܘܹܐ ܠܵܘܟ݂ܘܿܢ ܚܲܕ ܣܸܕܪܵܐ ܕܡܸܫܬܲܐܠܵܢܘܼܝܵܬܹ̈ܐ ܬܚܘܼܬ ܩܵܢܘܿܢܵܐ، ܘܐܲܝܵܐ ܬܠܝܼܬܵܐ ܝܠܵܗ̇ ܥܲܠ ܐܲܗܘܵܠܵܘܟ݂̈ܘܿܢ.

ܡܲܥܡܲܠܬܵܘܟ݂ܘܿܢ ܥܲܡܲܢ ܗܵܘܝܵܐ ܒܒܲܣܝܼܡܘܼܬܵܐ ܘܒܡܝܲܩܪܵܢܘܼܬܵܐ ܘܒܐܝܼܩܪܵܐ.

ܗܘܹܝܡܘܼܢ ܫܲܪ̈ܝܼܪܹܐ ܘܦܠܘܿܚܘܼܢ ܐܲܝܟ݂ ܕܩܵܢܘܿܢܵܐ ܒܛܠܵܒܵܐ ܝܠܹܗ.

ܓ̰ܲܘܸܒܘܼܢ ܠܗܘܿܢ ܒܘܼܩܵܪ̈ܲܢ ܒܥܸܕܵܢܵܐ ܘܗܲܒ݂ܠܘܼܢ ܠܲܢ ܟܠܵܗ̇ ܡܵܘܕܥܵܢܘܼܬܵܐ ܕܠܚܝܼܡܬܵܐ ܝܠܵܗ̇. ܒܲܠܟܵܐ ܕܒܲܩܪܲܚܠܵܘܟ݂ܘܿܢ ܒܘܼܩܵܪܹ̈ܐ ܝܲܢ ܟܲܦܫܲܚ ܡܵܘܕܥܵܢܘܼܬܵܐ ܙܵܘܕܵܢܬܵܐ ܒܢܝܼܫܵܐ ܠܚܲܬܘܼܬܹܐ (ܠܐܲܟܘܼܕܹܐ) ܕܡܸܢܕܝܼ ܕܐܲܚܢܲܢ ܦܲܪܡܘܼܝܹܐ ܝܘܲܚ ܝܼܠܹܗ ܫܲܪܝܼܪܵܐ ܘܚܲܕܬܵܐ.

ܡܲܕܥܘܼܢ ܠܲܢ ܐܸܢ ܚܲܕ ܦܲܪܨܘܿܦܵܐ ܐ݇ܚܹܪ݇ܢܵܐ ܒܸܥܒ݂ܵܕܵܐ ܝܠܹܗ ܩܲܝܘܼܡܘܼܬܵܐ ܩܵܐܠܵܘܟ݂ܘܿܢ. ܐܲܚܬܘܿܢ ܗܵܠܵܐ ܡܸܫܬܲܐܠܵܢܹܐ ܝܬܘܿܢ ܕܚܲܬܸܬܝܼܬܘܿܢ (ܕܐܲܟܸܕܝܼܬܘܿܢ) ܩܵܐ ܕܡܵܘܕܥܵܢܘܼܬܵܐ ܕܝܵܗܒ݂ܝܼܬܘܿܢ ܠܵܗ̇ ܩܵܐܠܲܢ ܝܼܠܵܗ̇ ܫܲܪܝܼܪܬܵܐ.

ܬܲܡܸܡܘܼܢ ܠܗܘܿܢ ܡܸܫܬܲܐܠܵܢܘܼܝܵܬܵܘܟ݂̈ܘܿܢ ܒܸܚܒ݂ܵܫܵܐ ܫܲܕܲܪܬܵܐ ܕܡܵܘܕܥܵܢܘܼܬܵܐ ܘܦܪܵܥܬܵܐ ܒܥܸܕܵܢܵܐ ܪܫܝܼܡܬܵܐ. ܐܸܢ ܠܹܐ ܡܵܨܝܼܬܘܿܢ، ܡܲܕܥܹܝܡܘܼܢ ܠܲܢ ܐܲܝܟ݂ ܟܡܵܐ ܓ̰ܲܠܕܹܐ ܕܡܸܬܡܲܨܝܵܢܬܵܐ ܝܠܵܗ̇ ܡܸܢ ܩܲܕ݇ܡ ܥܸܕܵܢܵܐ ܪܫܝܼܡܬܵܐ ܗܵܕܟ݂ܵܐ ܕܐܲܚܢܲܢ ܡܵܨܲܚ ܕܣܵܢܕܲܚܠܵܘܟ݂ܘܿܢ.

ܚܲܡܹܝܡܘܼܢ ܣܸܓ݂ܠܹ̈ܐ ܛܵܒ݂ܹ̈ܐ ܘܗܲܒ݂ܠܘܼܢ ܠܗܘܿܢ ܩܵܐܠܲܢ ܐܝܼܡܲܢ ܕܣܵܢܩܲܚ ܐܸܠܲܝܗܝ.

ܡܲܣܸܡܘܼܢ ܒܵܠܵܐ ܘܚܲܡܹܝܡܘܼܢ ܠܵܗ̇ ܡܵܘܕܥܵܢܘܼܬܵܐ ܕܗܝܼܵܝܘܼܬܵܘܟ݂ܘܿܢ ܒܚܕܵܐ ܕܘܼܟܬܵܐ ܫܲܝܢܵܝܬܵܐ ܘܡܲܕܥܹܝܡܘܼܢ ܠܲܢ ܐܝܼܡܲܢ ܕܡܵܘܕܥܵܢܘܼܬܵܘܟ݂ܘܿܢ ܫܲܚܠܘܼܦܹܐ ܝܠܵܗ̇.

ܦܵܣܘܼܥܝܵܬܹ̈ܐ ܕܫܵܩܠܝܼܬܘܿܢ ܠܗܘܿܢ ܐܸܢ ܒܵܥܝܼܬܘܿܢ ܕܚܕܵܐ ܩܛܵܥܬܵܐ ܦܵܝܫܵܐ ܨܘܼܚܨܝܼܬܵܐ ܚܕܵܐ ܓܵܗܵܐ ܐ݇ܚܹܪ݇ܢܵܐ

ܐܸܢ ܐܲܚܬܘܿܢ ܗܲܡܘܼܢܹܐ ܝܬܘܿܢ ܕܐܲܚܢܲܢ ܥܒ݂ܝܼܕܹܐ ܝܘܲܚ ܚܲܕ ܚܸܠܛܵܐ ܓܵܘ ܩܛܵܥ̈ܝܵܬܲܢ، ܒܸܕ ܦܵܠܚܲܚ ܥܲܡܵܘܟ݂ܘܿܢ ܩܵܐ ܫܪܵܝܬܵܐ ܕܩܸܬܪܵܐ ܒܦܫܝܼܛܘܼܬܵܐ ܘܐܲܝܟ݂ ܟܡܵܐ ܓ̰ܲܠܕܹܐ ܕܡܸܬܡܲܨܝܵܢܬܵܐ ܝܠܵܗ̇.

ܐܲܚܢܲܢ ܠܹܐ ܡܵܨܲܚ ܕܫܲܚܠܸܦܲܚܠܹܗ ܩܵܢܘܿܢܵܐ. ܐܝܼܢܵܐ ܡܵܨܲܚ ܗܲܝܸܪܲܚܠܵܘܟ݂ܘܿܢ ܕܦܲܪܡܝܼܬܘܿܢ ܕܵܐܟ݂ܝܼ ܩܵܢܘܿܢܵܐ ܦܠܵܚܵܐ ܝܠܹܗ ܒܢܸܙܒܲܬ ܠܐܲܗܘܵܠܵܘܟ݂̈ܘܿܢ.

ܐܵܦ ܒܸܕ ܦܲܫܩܲܚܠܗܘܿܢ ܓܘܼܒܵܝܵܘܟ݂̈ܘܿܢ ܒܸܚܒ݂ܵܫܵܐ ܓܘܼܒܵܝܹ̈ܐ ܩܵܢܘܿܢܵܝܹ̈ܐ ܨܲܚܨܘܼܝܹܐ ܗܲܩܘܼܝܵܬܹ̈ܐ ܘܕܵܐܟ݂ܝܼ ܡܲܩܪܸܒ݂ܝܼܬܘܿܢ ܚܕܵܐ ܩܒ݂ܵܠܬܵܐ.

ܐܲܝܟ݂ ܚܕܵܐ ܦܵܣܘܿܥܬܵܐ ܩܲܕܡܵܝܬܵܐ، ܕܪܘܿܫܘܼܢ ܠܗܘܿܢ ܢܹܓܵܪܵܢܘܼܝܵܬܵܘܟ݂̈ܘܿܢ ܥܲܡܲܢ ܠܸܚܙܵܝܵܐ ܐܸܢ ܐܲܚܢܲܢ ܡܵܨܲܚ ܕܫܵܪܲܚܠܗܘܿܢ. ܒܲܠܟܵܐ ܕܦܝܼܫܹܐ ܝܬܘܿܢ ܗܘܵܐ ܡܘܼܕܸܥܝܹܐ ܡܸܢ ܩܲܕ݇ܡ ܥܸܕܵܢܵܐ ܩܵܐ ܡܵܢܝܼ ܡܲܚܒܸܪܝܼܬܘܿܢ. ܐܸܢ ܠܵܐ ܝܬܘܿܢ ܦܝܼܫܹܐ ܡܘܼܕܸܥܝܹܐ، ܡܵܨܝܼܬܘܿܢ ܡܲܚܒܸܪܝܼܬܘܿܢ ܠܲܢ.

ܐܵܦ ܡܵܨܝܼܬܘܿܢ ܕܛܵܠܒܝܼܬܘܿܢ ܕܪܵܒܵܐ ܡܸܢ ܩܛܵܥ̈ܝܵܬܲܢ ܦܵܝܫܝܼ ܨܘܼܚܨܸܝܹܐ ܒܝܲܕ ܚܲܕ ܦܲܠܵܚܵܐ ܫܲܪܝܵܐ ܕܠܲܝܬ ܗܘܵܐ ܠܹܗ ܐܝܼܕܵܐ ܓܵܘ ܥܒ݂ܵܕܬܵܐ ܕܩܛܵܥܬܵܐ ܩܲܕܡܵܝܬܵܐ.

ܐܸܢ ܠܵܐ ܝܬܘܿܢ ܣܲܙܓܘܼܪܹܐ ܥܲܡ ܨܲܚܨܵܝܬܲܢ ܓܲܘܵܝܬܵܐ، ܡܵܨܝܼܬܘܿܢ ܕܛܵܠܒܝܼܬܘܿܢ ܚܕܵܐ ܨܲܚܨܵܝܬܵܐ ܒܲܪܵܝܬܵܐ. ܒܣܲܗܡܵܐ ܙܵܘܕܵܐ ܕܥܸܕܵܢܵܬܹ̈ܐ، ܓܵܪܲܓ ܕܗܵܘܝܼܬܘܿܢ ܗܘܵܐ ܛܠܝܼܒܹܐ ܚܕܵܐ ܨܲܚܨܵܝܬܵܐ ܓܲܘܵܝܬܵܐ ܡܸܢܲܢ ܘܓܵܪܲܓ ܕܠܵܐ ܗܵܘܝܼܬܘܿܢ ܗܘܵܐ ܚܸܕܝܹܐ ܒܦܠܵܛܵܐ ܕܨܲܚܨܵܝܬܵܐ ܡܸܢ ܩܲܕ݇ܡ ܕܛܵܠܒܝܼܬܘܿܢ ܗܘܵܐ ܚܕܵܐ ܨܲܚܨܵܝܬܵܐ ܒܲܪܵܝܬܵܐ.

ܬܠܝܼܬܵܐ ܝܠܵܗ̇ ܥܲܠ ܦܸܨܠܵܐ ܕܩܛܵܥܬܵܐ ܕܠܵܐ ܝܬܘܿܢ ܣܲܙܓܘܼܪܹܐ ܥܲܡܵܗ̇، ܒܲܠܟܵܐ ܕܡܵܨܝܼܬܘܿܢ ܕܦܵܪܫܝܼܬܘܿܢ ܡܸܢ ܚܲܕ ܣܸܕܪܵܐ ܕܓܘܼܒܵܝܹ̈ܐ ܩܵܐ ܠܸܥܒ݂ܵܕܘܿܗ̇ ܨܲܚܨܵܝܬܵܐ ܒܲܪܵܝܬܵܐ، ܐܲܝܟ݂ ܒܵܬܲܝ̈ ܕܝܼܢܵܐ ܝܲܢ ܡܵܘܬܒ݂ܹ̈ܐ ܕܝܼܢܵܝܹ̈ܐ.

ܦܵܣܘܿܥܝܵܬܹ̈ܐ ܕܫܵܩܠܝܼܬܘܿܢ ܠܗܘܿܢ ܐܸܢ ܠܵܐ ܝܬܘܿܢ ܚܸܕܝܹܐ ܒܚܸܠܡܲܬܲܢ

ܐܵܢܲܢܩܵܝܬܵܐ ܝܠܵܗ̇ ܩܵܐܠܲܢ ܕܝܵܕܥܲܚ ܐܝܼܡܲܢ ܕܐܲܚܬܘܿܢ ܠܵܐ ܝܬܘܿܢ ܚܸܕܝܹܐ ܗܵܕܟ݂ܵܐ ܕܡܵܨܲܚ ܕܥܵܒ݂ܕܲܚ ܠܵܗ̇ ܚܸܠܡܲܬܲܢ ܕܗܵܘܝܵܐ ܒܘܼܫ ܛܵܒ݂ܬܵܐ.

ܬܵܡܵܐ ܐܝܼܬ ܚܲܕ ܡܸܢܝܵܢܵܐ ܕܦܵܣܘܿܥܝܵܬܹ̈ܐ ܕܡܵܨܝܼܬܘܿܢ ܕܫܵܩܠܝܼܬܘܿܢ ܠܗܘܿܢ ܐܸܢ ܠܵܐ ܝܘܲܚ ܡܘܼܣܒ݂ܸܥܝܲܝܗܝ ܣܒܵܪ̈ܝܵܬܵܘܟ݂ܘܿܢ، ܝܲܢ ܐܸܢ ܒܸܚܫܵܒ݂ܵܐ ܝܬܘܿܢ ܕܐܲܚܢܲܢ ܠܵܐ ܝܘܲܚ ܦܠܝܼܚܹܐ ܐܲܝܟ݂ ܕܩܝܵܡܲܢ ܒܸܛܠܵܒܵܐ ܝܠܹܗ:

  1. ܦܵܣܘܿܥܬܵܐ ܩܲܕܡܵܝܬܵܐ ܝܼܠܵܗ̇ ܕܕܵܪܫܝܼܬܘܿܢ ܠܗܘܿܢ ܢܸܓܵܪܵܢܘܼܝܵܬܵܘܟ݂̈ܘܿܢ ܥܲܡ ܚܲܕ ܦܲܠܵܚܵܐ ܕܡܲܟ݂ܬܒ݂ܵܐ ܕܡܲܕܲܐܬܵܐ (ATO) ܘܗܵܘ ܒܸܕ ܓ̰ܲܪܸܒ ܕܫܵܪܹܐ ܠܹܗ ܩܸܛܪܵܘܟ݂ܘܿܢ. ܒܲܠܟܵܐ ܕܦܝܼܫܹܐ ܝܬܘܿܢ ܗܘܵܐ ܡܘܼܕܸܥܝܹܐ ܡܸܢ ܩܲܕ݇ܡ ܥܸܕܵܢܵܐ ܩܵܐ ܡܵܢܝܼ ܡܲܚܒܸܪܝܼܬܘܿܢ. ܐܸܢ ܠܵܐ ܝܬܘܿܢ ܦܝܼܫܹܐ ܡܘܼܕܸܥܝܹܐ، ܡܵܨܝܼܬܘܿܢ ܡܲܚܒܸܪܝܼܬܘܿܢ ܠܲܢ.
  2. ܐܸܢ ܠܵܐ ܝܬܘܿܢ ܚܸܕܝܹܐ، ܡܵܨܝܼܬܘܿܢ ܛܵܠܒܝܼܬܘܿܢ ܕܗܲܡܙܸܡܝܼܬܘܿܢ ܥܲܡ ܚܲܕ ܡܕܲܒܪܵܢܵܐ.
  3. ܐܸܢ ܐܵܗܵܐ ܗܵܠܵܐ ܠܵܐ ܝܠܹܗ ܒܸܫܪܵܝܲܝܗܝ ܢܸܓܵܪܵܢܘܼܝܵܬܵܘܟ݂̈ܘܿܢ، ܡܵܨܝܼܬܘܿܢ ܝܵܗܒ݂ܝܼܬܘܿܢ ܪܸܥܝܵܢܵܘܟ݂̈ܘܿܢ ܘܡܲܚܫܲܚܝܵܬܵܘܟ݂̈ܘܿܢ ܒܢܝܼܫܵܐ ܕܥܵܒ݂ܕܲܚܠܗܘܿܢ ܐܘܼܪ̈ܚܵܬܹܐ ܕܦܘܼܠܚܵܢܲܢ ܕܗܵܘܝܼ ܒܘܼܫ ܛܵܒ݂ܹ̈ܐ، ܝܲܢ ܡܵܨܝܼܬܘܿܢ ܡܲܩܪܸܒ݂ܝܼܬܘܿܢ ܚܕܵܐ ܩܒ݂ܵܠܬܵܐ ܪܘܼܫܡܵܝܬܵܐ.

ܐܲܚܢܲܢ ܟܹܐ ܫܵܩܠܲܚ ܪܵܒܵܐ ܝܘܼܩܪܵܐ ܩܵܐ ܫܪܵܝܬܵܐ ܕܟܠܲܝܗܝ ܩܒ݂ܵܠܝܵܬܹ̈ܐ ܘܢܝܼܫܲܢ ܝܠܹܗ ܕܫܵܪܲܚܠܗܘܿܢ ܒܓ̰ܲܠܕܘܼܬܵܐ ܘܒܟܹܐܢܘܼܬܵܐ.

ܡܲܩܪܲܒ݂ܬܵܐ ܕܚܕܵܐ ܩܒ݂ܵܠܬܵܐ ܠܹܐ ܒܸܕ ܥܵܒ݂ܕܵܐ ܟܵܐܪ ܥܲܡ ܐ݇ܚܝܵܢܘܼܬܵܘܟ݂ܘܿܢ (ܥܹܠܵܩܵܘܟ݂ܘܿܢ) ܥܲܡܲܢ.

ܐܸܢ ܠܵܐ ܝܬܘܿܢ ܚܸܕܝܹܐ ܡܸܢ ܒܵܬ݇ܪ ܡܲܩܪܲܒ݂ܬܵܐ ܕܚܕܵܐ ܩܒ݂ܵܠܬܵܐ ܩܵܐܠܲܢ، ܡܵܨܝܼܬܘܿܢ ܕܡܲܚܒܸܪܝܼܬܘܿܢ ܩܵܐ ܡܦܲܬܫܵܢܵܐ ܓܵܘܵܢܵܝܵܐ ܕܡܲܕܲܐܬܵܐ ܘܡܨܲܚܨܸܝܵܢܵܐ ܕܩܘܵܠܝܵܬܹ̈ܐ ܕܐ݇ܣܝܼܪܹܐ ܝܢܵܐ ܒܡܲܕܲܐܬܵܐExternal Link ܘܕܛܵܠܒܝܼܬܘܿܢ ܕܚܕܵܐ ܨܲܚܨܵܝܬܵܐ ܫܪܝܼܬܵܐ ܦܵܝܫܵܐ ܥܒ݂ܝܼܕܬܵܐ.

ܐܵܦ ܡܵܨܝܼܬܘܿܢ ܛܵܠܒܝܼܬܘܿܢ ܚܘܼܠܵܦܵܐ ܡܸܢܲܢ ܐܸܢ ܐܲܚܬܘܿܢ:

  • ܗܲܡܘܼܢܹܐ ܝܬܘܿܢ ܕܥܵܒ݂ܘܿܕ̈ܘܼܝܵܬܲܢ ܡܘܼܒܪܹܐ ܠܗܘܿܢ ܚܕܵܐ ܡܸܫܬܲܐܠܵܢܘܼܬܵܐ ܩܵܢܘܿܢܵܝܬܵܐ
  • ܚܣܝܼܪܵܘܟ݂ܘܿܢ ܙܘܼܙܹ̈ܐ ܐܲܝܟ݂ ܚܲܕ ܦܠܵܛܵܐ ܕܦܘܼܠܚܵܢܲܢ ܚܪܝܼܒ݂ܵܐ.

ܕܵܐܟ݂ܝܼ ܠܡܲܚܒܘܼܪܹܐ ܩܵܐܠܲܢ

ܐܸܢ ܐܝܼܬܠܵܘܟ݂ܘܿܢ ܒܘܼܩܵܪܹ̈ܐ ܝܲܢ ܢܸܓܵܪܵܢܘܼܝܵܬܹ̈ܐ ܒܘܼܕ ܡܸܫܬܲܐܠܵܢ̈ܘܼܝܵܬܲܢ ܩܵܐܠܵܟ݂ܘܿܢ ܝܲܢ ܒܘܼܕ ܡܸܢܕܝܼ ܕܒܸܛܠܵܒܵܐ ܝܘܲܚ ܡܸܢܵܘܟ݂ܘܿܢ، ܡܲܚܒܸܪܘܼܢ ܩܵܐܠܲܢ ܝܲܢ ܩܵܐ ܚܲܕ ܡܵܠܘܿܟ݂ܵܐ ܚܲܒܝܼܪܵܐ.

QC57432