Wen yu pei tax
Mipla (da ATO) kolekt dis tax mani po da gabmant. Wi kolem paying tax. Da gabmant yuze dem tax mipla kolektem po dipren service wase:
- hospital
- edukeisan
- road
- train.
Aumas tax yu pei ol wokemaut prom aumas mani yu mekem prom zob blo yu ane ip yu gad tax file namba (TFN).
Tax file namba blo yu
Dis TFN e spesil namba blo yu wea dem eria blo tax ane superannuation. E free po gede TFN.
Ip yu nogad TFN, yu mait pei tumas tax.
E gad dipren wei yu ken aplai po TFN. E mo kwik po aplai po TFN online.
E gad da peipa application form sodat Aboriginal ane Tores Streit Ailan pipol ken aplai po TFN. Yu ken mekem diskain ip yu nogad ol dem peipa po prubem online uda yu, wase prapa birth certificate, passport o drivers licence.
Media: Yumplatok – 01. Tax po wan person (Tax for individuals)
https://tv.ato.gov.au/ato-tv/media?v=bi9or7orzszdgfExternal Link (Duration: 0:59)
Tax return blo yu
Wen yu gede mani prom zob blo yu den yu mas lodge tax return ebri yia. Ebriwan spostu lodge dat return bai 31 Oktober. Yu ken mekem online bai yuze myTax wea da ATO online service, o wea registered tax agent, o yuze peipa form.
Yu ken gede pamle o pren blo yu po elpe yu wea da tax return. Dempla no kan aske yu po mani po elpe yu — mata registered tax agent lau po gede mani prom yu po prepare dem tax return. Yu mas sain da tax return yuselp bikoz yu da wan uda bin gibe ebri dem inpomeisan.
Ip yu sabe ip yu spostu lodge tax return o ip yu gad problem wiskain po lodgem, den yu ken gede pri elp prom mipla Tax Help pipol.
Yu ken ring da Indigenous helpline lo 13 10 30 (8:00 am po 6:00 pm, Monday po Friday, bat no lo public holiday).
Go ane download mipla factsheet baut Wiskain po lodge tax return blo yuExternal Link.
Media: Yumplatok – 02. Tax po wan person (Tax for individuals)
https://tv.ato.gov.au/ato-tv/media?v=bd1bdiurzac63nExternal Link (Duration: 0:59)
Aumas mani yu bin gedem
Wen yu meke tax return e mas gad ebri income o mani yu bin mekem wea dat yia. Yu mait bin gede mani diskain prom:
- zob blo yu
- investment mani
- mani yu bin gedem prom gabmant o grant mani
- nada ples.
Wen yu lodgem online wea myTax, mipla go putem dem inpomeisan mipla pinis gad.
Mani yu no nid po putem wea tax return
E gad sam mani yu no nid po adem wea income blo yu. E diskain, Aboriginal and Tores Streit Ailan pipol ane Indigenous holding entities no pei income o capital gain tax lo native title payments o benefits.
Media: Yumplatok – 03. Tax po wan person (Tax for individuals)
https://tv.ato.gov.au/ato-tv/media?v=bd1bdiurzapyr8External Link (Duration: 0:38)
Claim dem deductions
Wen yu meke tax return, yu lau po gede tax deductions po sam dipren kost blo yu. E mait bi, yu ken claim deduction po dem ting yu bin nid po bai po meke da wok blo yu.
Yu mas kipe records (wase receipts) po dem dipren expense blo yu. Yu ken yuze da myDeductions tool wea da ATO app po kipe rekord blo dem ting wea wan ples.
Offsets ane rebates
Yu mait gad rait po gede sam tax offsets ane rebates. Tax offsets ane rebates go kat aumas tax yu nid po pei.
Ip yu stap wea sam spesil remote o ausaid eria blo Australia yu mait gad rait po gede da
zone tax offset.
Ip yu yuze fuel (wase diesel o petrol) po meke pauwa po yu aus, yu mait gad rait po gede fuel tax credits. Yu mas pute neim blo yu daun po gede fuel tax credits bipo yu ken claim po dat rebate.
Media: Yumplatok – 04. Tax po wan person (Tax for individuals)
https://tv.ato.gov.au/ato-tv/media?v=bd1bdiurzszobnExternal Link (Duration: 0:58)